ZPM hi an in sawi angin an awmlo- MNF President

by News Editor

Tualchhung News

ZORAM TODAY| 21st April, 2025: Vawiin hian Kolasib District chhunga MNF VC tling tharte lawmpuina hun, Diakkawn YMA Hall, Kolasib-ah hman a ni a. He hun hi Zoramthanga MNF President-in a hmanpui a ni.

Zoramthanga chuan thusawiin, MNF VC zawng zawngte chu Pathian ṭihna nen theih tawp chhuaha khawtlang rawngbawl turin a chah a. "Covid hripuiin min nuai a, ramri buai, vawk hri leng, kang mei, lirnghing, Burma leh Manipur, Bangladesh refugee-in min chim bawk a. Harsatna kan tawk nasa hle. Kan tum ber chu damkhawchhuah a ni ringawt mai a ni. Khati chung khan hmasawnna nasa tak kan kalpui thei kha a lawmawm em em a, kha term-ah khan Pathian hnena lawmthu sawina tur kan ngah em em a ni," a ti.

MNF President chuan, "ZPM hi itawm chitin rengin an inzuar a. Bang lehlama nula aw mawi tak, amah kan la hmuhchian loh kha nupuiah Zoram mipuiin kan nei ta a. Kan han vote ta ruih ruih a, kan vote tling ta a. Thil kha an sawi awl bawk a, D-A-H DAH aṭangin an ṭan a, tunah chuan an sawi loh ang hlirin an awm ta a. An sawi angin an awm lo a ni. Kum khat chuang an sorkar chhung hian sorkar hnathawkah a ni telin an tlahniam zel a, sorkar hnathawk lian an nuih a za a, naupang inkhuallem kan ang, an ti," a ti.

Zorama chuan, "Sorkar hnathawk tê deuh ho an lungawi lo mek bawk a, cancer vei pawh an thliar tawh lo. Doctor rual an phin leh a, health care te an ti suakbak vek a. naupang leh zirtirtute lungawi l9hna a in-up chho leh mek a. Sikul dinhmun sang zawka kan hlan zawng zawngte kha an cancel a, Finance Minister-in 'a theih' ka tih avanga kan tih a ni. Covid hripui lai pawhin a theih a, Covid awm loh hnuah a theih loh an ti ta si hi a mak hle. Zunteii nu ka siam ang che i tia, lungngaihna hlir lungngaihna hlir, tih ang chiah a ni. Hmunphiah sawi chuan ngaihthlak loh an duh zawk a, sawhthing thar tur zat nia an hriat kha hmun 10-a hmun khat pawh an la lei lo. Sawhthing leh thlaite hi thingtum ang a dah ṭhat a, duh hun hun a hralh tum chi a ni lo. A huna seng a, a huna hralh a ngai. ZPM sorkar hi Kut hnathawktuteah a ni telin an tlahniam zel a ni," a ti bawk.

MNF President chuan, "ZPM sorkar hi a ni telin an tlahniam tulh tulh a, MNF kan sang leh tulh tulh thung. MNF nge nge kha an lo rintlak a, mipuiin kan lo chhawr a ni, an ti ṭan leh mek. ZPM hi an kal rei deuh hunah phei chuan an hmabak a nasa lo khawp ang. Mipuiin ZPM kan hrechiang sawt khawp mai," a ti bawk.

Zorama chuan, "Mizo Kristiante hi Pathianin min hman a duh a ni, tih hi ka sawi nawn leh duh a ni. Mizote hi mahni mipui mila Missionary tirchhuak tam ber kan nih ka ring a. Hun hnuhnunga Lalpa'n chanchinṭha hril turin min duh a, min cheimawi, min ti fip a, min buatsaih mek a ni," a ti bawk.

Lalrinsanga Ralte Serlui bial MLA pawhin thusawiin, "MNF chu Party dang ang kan ni lo, engti kawng zawng pawha sorkar tum tur kan ve ni lo. Pathian hming lam party kan ni a, kan chungah Pathian leh mipui thikthu a chhe bik a ni. VC member kalkhawmte Pathian dah hmasa chunga khawtlang rawngbawl turin ka ngen che u a ni. MNF VC hna a ṭha bik tur a ni a, kan danglam bik tur a ni," a ti.

"Covid harsatna avangin kum 2 deuh thaw Biak In dar a ri lo a, khawvelin hun harsa a tawk a. Ramriah silai a puak a, kha MNF sorkar liam ta khan harsatna nasa tak a tawk a ni. Khatih lai khan ZPM Party chu fel ber leh ṭha ber anga inzuarin an tih theih loh tur thlengin an tiam a ni. Tunah hian Lalduhoma hi tunge a nih mipuiin kan hre mek a ni. Ti tura an intiam an ti lo deuh vek a, an thutiam an tih loh hi sawi mai sen pawh a ni lo hial a ni," a ti bawk.

He inkhawm hi C Roṭhuamluaia, Kolasib East Block President-in a kaihruai a. Kolasib District huam chhunga MNF VC tlung thar mi 92 hnenah lawmpuina thuziak hlan an ni.